Cəlilabad rayonunun ucqar dağlıq ərazisində yerləşən Axtaxana kəndində yolsuzluq problemi əhalinin gündəlik həyatını iflic vəziyyətə salıb.
Sakinlərin Cenublu.az-a verdiyi məlumata görə, kəndə gedən əsas yol və kənddaxili yollar uzun illərdir bərbad vəziyyətdədir. Xüsusilə payız və qış aylarında yağıntılar nəticəsində yollar palçığa çevrilir, bu isə nəqliyyat vasitələrinin hərəkətini demək olar ki, mümkünsüz edir. Nəticədə kənd sakinləri rayon mərkəzinə getməkdə ciddi çətinliklərlə üzləşirlər.
Bildirilir ki, yalnız yay mövsümündə və havaların quraq keçdiyi dövrlərdə yoldan nisbətən istifadə etmək mümkün olur. Bu isə ilin böyük hissəsində kəndin faktiki olaraq təcrid olunması deməkdir.
Mövcud vəziyyət Axtaxana kəndində demoqrafik vəziyyətə də təsirsiz ötüşməyib. Sakinlər bildirir ki, yol probleminə görə bir çox ailə kəndi tərk edərək başqa ərazilərə köçür. Hazırda kənddə cəmi 36 ailə qalıb və bu rəqəm ildən-ilə azalmaqda davam edir.
