Bu gün Yardımlıdan olan şəhid Zahid Azad oğlu Zairlinin anım günüdür.
Cenublu.az xəbər verir ki, Zahid Zairli 2000-ci ildə mayın 10-da Dəlləkli kəndində anadan olub.
O, təhsilini bitirdikdən sonra, 2019-cu ildə hərbi xidmətə gedib. Zahid əsgərlər arasında keçirilən seçim müsabiqələrini müvəffəqiyyətlə tamamlayıb və XTQ-yə seçilən 25 əsgərdən biri olub. Arzusunda olduğu snayper kimi təlimlərə qatılıb.
Vətən müharibəsi zamanı Murovdağ, Suqovuşan, Füzuli, Cəbrayıl, Hadrut uğrunda gedən döyüşlərdə fəal iştirak etdiyinə görə yoldaşları arasında “Canavar” ləqəbi ilə tanınıb. Zahid Zairli oktyabrın 8-də Cəbrayıl rayonu uğrunda gedən döyüşlərdə yaralı yoldaşlarını xilas edərkən ürəyindən snayperlə vurularaq şəhid olub. Doğulduğu kənddə torpağa tapşırılıb.
Zahid Zairli “Vətən müharibəsi iştirakçısı'”, “Cəsur döyüşçü”, "Füzulinin azad olunmasına görə" və "Kəlbəcərin azad olunmasına görə" medalları ilə təltif olunub.
