Yardımlıda məktəb müəllimi ilə Təhsil İdarəsinin sektor müdiri əlbəyaxa olublar.
Təhsil Media xəbər verir ki, rayonun Bürzünbül kənd tam orta məktəbinin fiziki tərbiyə müəllimi Famil Zabidov Lənkəran-Astara Regional Təhsil İdarəsinin Yardımlı rayon sektorunun müdiri Kamal Təhməzovun otağına daxil olaraq məktəbə dərslik və metodiki vəsaitlərin verilmədiyinə görə etiraz edib. Elə hadisə də bundan sonra baş verib. Müəllim, təhsil sektorunun müdirinin iradına məhəl qoymadan mobil telefonu vasitəsilə videoçəkiliş edib. Məhz bu səbəbdən də tərəflər arasında mübahisə dava həddinə çatıb.
Təhsil İdarəsi tərəfindən verilən açıqlamada bildirilir ki, dərslik və metodiki vəsaitlər fiziki tərbiyə fənni üzrə təhsil proqramı (kurikulum) əsasında hazırlanaraq Elm və Təhsil Nazirliyi tərəfindən müəllim və şagirdlər üçün təqdim olunan video.edu.az, trims.edu.az və e-derslik.edu.az platformalarında yerləşdirilir.
Qeyd olunub ki, səsləndirilən digər iddialarla bağlı aparılan araşdırma Məktəbəqədər və Ümumi Təhsil üzrə Dövlət Agentliyi tərəfindən nəzarətə götürülüb. Məsələ ilə bağlı eyni zamanda hüquq-mühafizə orqanlarına məlumat verilib. Hazırda bu istiqamətdə araşdırma aparılır.
