Azad olunmuş ərazilərə səfər edən Yardımlı sakinin ən böyük arzusu itkin düşmüş qardaşı haqda məlumat almaqdır.
“Report”un Şuşaya ezam olunan əməkdaşının məlumatına görə, “Qarabağ itkin ailələri” İctimai Birliyinin təşkilatçılığı ilə ölkənin müxtəlif rayonlarından itkin düşmüş hesab edilən şəxslərin ailə üzvlərinin azad olunmuş ərazilərə səfəri baş tutub.
Səfərdə iştirak edən Yardımlı rayon sakini Rəşad Musayev qardaşı Kamal Musayevin 1994-cü ildə Kəlbəcər uğrunda gedən döyüşlər zamanı Murovdağ istiqamətində itkin düşdüyünü deyib:
“Bu gün biz günahsız soydaşlarımıza qarşı soyqırımının həyata keçirildiyi Xocalıdayıq. Biz bu gün burada sərbəst bir şəkildə gəzir, dinc sakinlərin qətlə yetirildiyi yerləri ziyarət edirik. Bizim bu yerləri, xüsusilə də kimliyi artıq müəyyən edilərək dəfn olunmuş soydaşlarımızın məzarını ziyarət etməyimiz bizə mənəvi təskinlik verir. Bu bizdə inam yaradır ki, tezliklə bizim də itkin sayılan ailə üzvlərimiz haqqında məlumat alacağıq. Bizə bu şəraiti yaradan ölkə başçısına, cənab Ali Baş Komandana təşəkkür edirəm. Bu torpaqlar uğrunda can alıb can verən vətən oğullarının ruhu qarşısında baş əyir, sağ qalanların əllərindən öpürük”.
