Bu gün Yardımlıdan olan Vətən müharibəsi şəhidi baş leytenant Valeh İsbat oğlu Məmiyevin anım günüdür.
Cenublu.az xəbər verir ki, Valeh Məmiyev 1994-cü il martın 27-də Yardımlı rayonunun Kürəçi kəndində dünyaya göz açıb.
O, 2015-ci ilin dekabr ayında leytenant rütbəsi ilə tank tağım komandiri kimi vətənə xidmətə başlayıb. 2018-ci ildə tank bölük komandiri vəzifəsinə yüksəlib. Xidmət etdiyi müddətdə “Azərbaycan Ordusunun 100 illiyi (1918-2018)” medalı ilə təltif edilib. 2020-ci il Türk-Azərbaycan təlimlərində iştirak edən Valeh təlimlərin sonunda Türkiyə Müdafiə Naziri Hulusi Akar tərəfindən şəxsən xüsusi fərqlənmə ilə mükafatlandırılıb.
Vətən müharibəsində iştirak edən Valeh oktyabrın 23-də Qubadlı rayonunun azad olunması uğrunda gedən döyüşlərdə şəhid olub. Ölümündən sonra “Azərbaycan Bayrağı” ordeni, “Vətən Uğrunda”, “Cəbrayılın azad olunmasına görə”, “Qubadlının azad olunmasına görə” medalları ilə təltif edilib.
