Paytaxtın Suraxanı rayonunda əvvəllər Cinayət Məcəlləsinin müxtəlif maddələri ilə səkkiz dəfə məhkum edilmiş, oğurluq əməllərinə görə axtarışda olan şəxs polis kapitanı, əslən Astaradan olan Fəxrəddin Nəsirova kəsici alətlə xəsarət yetirərək sonuncunun ölümünə səbəb olub. Bu haqda məlumatı Cenublu.az bu gün, 8 iyul tarixində verir.
41 yaşlı Mehman Səlahəddin oğlu Məmmədov polis əməkdaşı Fəxrəddin Nəsirov tərəfindən saxlanılarkən üzərində olan kəsici alətlə sonuncuya xəsarət yetirib və qaçmağa cəhd göstərib. Ağır xəsarət alan polis kapitanı Fəxrəddin Nəsirov yaralanmasına baxmayaraq, cəhdin qarşısını alıb və onu saxlayaraq digər polis əməkdaşlarına təhvil verib.
Xəsarət alan polis əməkdaşı xəstəxanaya çatdırılsa da, həyatını xilas etmək mümkün olmayıb.
Məlumata əsasən, polis kapitanı bir neçə il öncə polis sıralarından xaric olunub, daha sonra şəxsi istəyi ilə yenidən bərpa olunub.
Onunla vida mərasimində ailə üzvləri, Daxili İşlər Nazirliyinin əməkdaşları, o cümlədən daxili işlər naziri Vilayət Eyvazov iştirak edib.
