Bu gün Lənkərandan olan Vətən müharibəsi şəhidi Sənan Ağazadənin doğum günüdür.
Sənan Nizami oğlu Ağazadə 2000-ci il mayın 1-də Lənkəran rayonunun Göyşaban kəndində anadan olub. 2019-cu ildə hərbi xidmətə yollanan Sənan "Mən əfsanə olacağam!" deyirmiş.
Vətən müharibəsi zamanı Füzulinin azadlığı uğrunda gedən döyüşlərdə minaatan bölüyündə tuşlayıcı kimi savaşıb. Hədəfi sərrast nişan alması sayəsində düşmənin bir neçə hərbi texnikasını və 35 əsgərini məhv edib. Oktyabrın 14-də qəhrəmancasına şəhid olub.
Ölümündən sonra "Vətən uğrunda", "İgidliyə görə" və "Füzulinin azad olunmasına görə" medalları ilə təltif edilib.
