Bu gün Azərbaycan Silahlı Qüvvələrinin əsgəri, Vətən müharibəsi şəhidi Röyad Famil oğlu Məmmədovun doğum günüdür.
Röyad Məmmədov 2000-ci ildə Masallı rayonunun Mahmudavar kəndində dünyaya göz açıb. 2018-ci ildə Mahmudavar kənd tam orta məktəbini bitirib və Qərbi Kaspi Universitetinin nəzdində yaradılmış Qərbi Kaspi Kollecinə daxil olub. 1 ay təhsil aldıqdan sonra həqiqi hərbi xidmətə çağırılıb.
Vətən müharibəsi zamanı Füzulinin, Xocavəndin və Şuşanın azadlığı uğrunda gedən döyüşlərdə savaşıb. Röyad Məmmədov noyabrın 8-i Laçından Şuşaya gələn yolu ələ keçirmək uğrunda döyüşlər zamanı şəhidlik zirvəsinə ucalıb. O, Mahmudavar kəndində torpağa tapşırılıb.
Ölümündən sonra “Vətən uğrunda” və “Şuşanın azad olunmasına görə” medalları ilə təltif olunub.
