Ötən gün Lənkəranın Vilvan kəndində hündürlükdən yıxılan ustalar ilə bağlı yeni məlumat var.
Cenublu.az-a bu barədə ev sahibi Xanağa Səbziyev məlumat verib.
O bildirib ki, ustalar 12 gün işləyiblər:
“Evə bətkəş vururdular. İşləri də yaxşı idi. Çox güman ki, ayaqlarının altında taxta sürüşüb, hər ikisi yıxılıb. Usta dedi ki, mən bətkəş vururam. Özü ilə köməkçi də gətirmişdi. İki nəfər işləyirdilər. Mən də həyətdə idim, gördüm ki, səs gəlir, yerə düşüblər. Təcili yardıma zəng vurdum, xəstəxanaya apardılar”.
Ağır xəsarət alan ustalar dərhal Lənkəran rayon mərkəzi xəstəxanasının təcili yardım şöbəsinə hospitalizasiya olunublar. Həkimlər yaralılara zəruri ilkin tibbi yardımlar göstərib və vəziyyətlərinə uyğun olaraq reanimasiya şöbəsinə yerləşdiriliblər. Buna baxmayaraq, koma vəziyyətində olan Ruslan Zülfüqarovun həyatını xilas etmək mümkün olmayıb. O, aldığı xəsarətlərdən ölüb.
Cenublu.az-ın əməkdaşı Lənkəran Rayon Mərkəzi Xəstəxanasının ictimaiyyətlə əlaqələr üzrə mütəxəssisi Zamin Rzayev ilə əlaqə saxlayıb.
Bildirilib ki, 04.10.2024-cü il tarixində saat 18:24 radələrində Lənkəran rayonu Vilvan kəndində baş vermiş bədbəxt hadisə nəticəsində 2 nəfər (kişi cinsli) şəxs koma, qapalı kəllə beyin travması, sol bazu sümüyünün sınığı, sol qabırğaların sınığı diaqnozu ilə Lənkəran Rayon Mərkəzi Xəstəxanasının təcili yardım şöbəsinə hospitalizasiya olunub:
“Xəstələrə zəruri ilkin tibbi xidmətlər göstərilib, vəziyyətlərinə uyğun olaraq reanimasiya şöbəsinə yerləşdiriliblər. Qeyd edək ki, bütün reanimasyon tədbirlərə baxmayaraq, xəsarət alanlardan birinin həyatını xilas etmək mümkün olmayıb.
Meyit aidiyyəti üzrə təhvil verilib. Faktla bağlı rayon prokurorluğunda araşdırma aparılır”.
Xatırladaq ki, ötən gün Lənkəranın Vilvan kəndində Usta olan, Lənkəran şəhər sakini 1987-ci il təvəllüdlü Ruslan Samid oğlu Zülfüqarov və Lənkəran rayon Sütəmurdov kənd sakini 1969-cu il təvəllüdlü İlyas Hidayət oğlu Səfərov qurduqları “ayaqaltıdan” yıxılıblar.
Video teleqram kanalımızda:
