Birinci mərhələdən sonra I ixtisas qrupu üzrə 1304, II ixtisas qrupu üzrə 246, III ixtisas qrupu üzrə 400, IV ixtisas qrupu üzrə 463 və V ixtisas qrupu üzrə 348 plan yeri boş qalıb.
Cenublu.az-ın verdiyi xəbərə görə, Dövlət İmtahan Mərkəzinin (DİM) İdarə Heyətinin sədri Məleykə Abbaszadə universitetlərə qəbul nəticələri ilə bağlı keçirdiyi brifinqdə bu məlumatı açıqlayıb.
DİM sədri qeyd edib ki, 1-ci mərhələdən sonra tələbə qəbulu aparılan 44 ali təhsil müəssisəsindən 25-də plan yerlərinin 95%-dən çoxu dolub. Həmçinin 8 ali təhsil müəssisəsində (Azərbaycan Tibb Universiteti, Azərbaycan Respublikasının Prezidenti yanında Dövlət İdarəçilik Akademiyası, ADA Universiteti, Azərbaycan Dövlət Dəniz Akademiyası, Bakı Ali Neft Məktəbi, Dövlət Gömrük Komitəsinin Akademiyası, Azərbaycan İlahiyyat İnstitutu, Azərbaycan Əmək və Sosial Münasibətlər Akademiyası) yerlər tamamilə dolub.
