Türkiyənin gənclərdən ibarət nümayəndə heyəti Lənkərana səfər edib.
Cenublu.az Lənkəran-Astara Regional Gənclər və İdman İdarəsinə istinadən xəbər verir ki, Azərbaycan-Türkiyə Gənclər və İdman Nazirlikləri arasında gənclər sahəsində "Mütəxəssis mübadilə proqramı" çərçivəsində Türkiyənin gənclərdən ibarət nümayəndə heyəti Lənkəran şəhərində səfərdə olub. Səfər 6-7 oktyabr tarixlərində baş tutub.
Səfər çərçivəsində gənclər Lənkəran Gənclər Evinə gedərək orada fəaliyyət göstərən dərnəklərin, klubların fəaliyyətilə yaxından tanış olublar. Daha sonra qonaqlar Gənclər Evinin könüllüləri və Cənub könüllüləri qrupunun üzvləri ilə çay süfrəsi ətrafında söhbət edib, fikir mübadiləsi aparıb, könüllülük fəaliyyəti haqqında qarşılıqlı müzakirələr aparıblar.
Qeyd edək ki, səfər çərçivəsində Türkiyədən gələn gənclərdən ibarət nümayəndə heyəti Lənkəran şəhərinin tarixi abidələrinə, gəzməli və görməli yerlərinə səfər edib. Onlar Tarix Diyarşünaslıq Muzeyi, 2 dəfə Sovet İttifaqı Qəhrəmanı adı almış, tank qoşunları generalı Həzi Aslanovun ev muzeyində olub, Xanbulan gölünün mənzərəsini seyr edib.
