Lənkəran rayon sakini olan yaşlı bir nəfər təqaüd kartındakı pulun tanımadığı şəxs tərəfindən oğurlandığı barədə polisə məlumat verib. Bu haqda məlumatı Cenublu.az bu gün, 19 iyul tarixində verir.
Lənkəran Şəhər Rayon Polis Şöbəsi əməkdaşlarının keçirdikləri tədbirlərlə həmin vəsaitin zərərçəkmişin kartdakı pulu bankomatdan çıxarmaq üçün kömək istədiyi Kənan Əlizadə tərəfindən oğurlandığı məlum olub.
Araşdırmalarla K.Əlizadənin kömək üçün ona müraciət edən digər 3 təqaüdçünün kartından da oğurluq etdiyi müəyyən edilib.
O, bankomatların yaxınlığında dayanaraq və kömək istəyən təqaüdçülərin kartlarını alaraq, əvəzində onlara müddəti bitmiş başqa bank kartları qaytarıb.
K.Əlizadənin əməllərindən zərər çəkən başqa vətəndaşlar varsa, bu barədə polis orqanlarına məlumat verə bilərlər.
