Lənkəran Şəhər İcra Hakimiyyətinin (ŞİH) başçısı Taleh Qaraşov növbəti səyyar görüş-qəbulunu Ləj kənd İnzibati Ərazi Dairəsinin sakinləri ilə keçirib. Bu haqda məlumatı Cenublu.az bu gün, 19 iyul tarixində verir.
Səyyar görüşdə İcra Hakimiyyəti aparatının məsul şəxsləri, hüquq mühafizə orqanlarının rəhbərləri, yerli idarə və müəssisələrin nümayəndələri də iştirak ediblər.
Ötən görüş-qəbulda qaldırılan məsələlərin icra vəziyyəti barədə yerli sakinləri məlumatlandıran Taleh Qaraşov bildirib ki, İcra Hakimiyyətinin səlahiyyətləri çərçivəsində olan və ədalətlə qaldırılan bütün məsələlər həllini tapıb.
İcra başçısı Ləj sakinlərinin şəxsi və ümumi problemlərini dinləyib, qaldırılan məsələlərin qanunvericiliyin tələblərinə uyğun ən qısa müddətdə həll edilməsi üçün müvafiq tapşırıqlarını verib, yerli icra hakimiyyətinin fəaliyyət dairəsinə aid olmayan müraciətlər müvafiq qurumlara yönləndirilmək üçün qeydiyyata alınıb.
