Lənkərandan olan şəhid Zaur İsmayılzadənin qəhrəmanlıq yolundan bəhs edən ''Buğra tələsi'' kitabının təqdimatı və mövlud günü münasibətilə tədbir keçiriləcək. Bu haqda məlumatı Cenublu.az bu gün, 27 iyul tarixində verir.
Təqdimat 29 iyul tarixində saat 14:00-da Beynəlxalq Muğam Mərkəzində təşkil olunacaq.
Tədbir Mədəniyyət Nazirliyinin dəstəyi və Mirvarid Dilbazi Poeziya Məclisinin təşkilatçılığı ilə həyata keçiriləcək.
Həmçinin 30 iyul tarixində saat 11:00-da Qəni Vəliyev adına Lənkəran şəhər Mədəniyyət Mərkəzində şəhidin mövlud gününə həsr olunmuş mərasim baş tutacaq, məzarı ziyarət olunacaq.
Zaur Nizami oğlu İsmayılzadə 29 iyul 1995-ci ildə Lənkəran rayonunun İstisu qəsəbəsində anadan olub.
Vətən müharibəsində könüllü iştirak edən Z.İsmayılzadə 7 oktyabr tarixində Füzuli rayonu istiqamətində şəhid olub.
Ölümündən sonra “Vətən uğrunda”, “Cəsur döyüşçü” və “Füzulinin azad olunmasına görə”, "Şuşanın azad olunmasına görə" medalları və 3-cü dərəcəli "Vətənə xidmətə görə" ordeni ilə təltif olunub.
