Lənkəran–Astara Regional Təhsil İdarəsi üzrə 18 şagird Respublika Fənn Olimpiadalarında medal qazanıb. Bu haqda məlumatı Cenublu.az bu gün, 6 iyul tarixində verir.
Bakı Konqres Mərkəzində Respublika Fənn Olimpiadalarının qaliblərinə mükafatlar təqdim edilib. Mərasimə Elm və Təhsil naziri Emin Əmrullayev, Naxçıvan Muxtar Respublikasının təhsil naziri Elxan Nəcəfov, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Dövlət İmtahan Mərkəzinin Direktorlar Şurasının sədri Məleykə Abbaszadə, millət vəkilləri, dövlət və özəl qurumların rəsmiləri, ali təhsil müəssisələrinin rektorları, nazirlik yanında İctimai Şuranın üzvləri, təhsil ekspertləri, şagird və valideynlər, eləcə də digər qonaqlar cəlb olunublar.
Tədbirdə Təhsil İnstitutunun direktor müavini Fuad Qarayev Respublika Fənn Olimpiadaları barədə təqdimatla çıxış edib. O bildirib ki, ölkə üzrə şagirdlər 2014-2024-cü illər ərzində bu yarışlarda 470 medal qazanıblar. Bu il 8 fənn və 2 yaş qrupu üzrə keçirilən fənn olimpiadalarında 244 nəfər bürünc, 163 nəfər gümüş, 84 nəfər isə qızıl medala layiq görülüb.
Daha sonra Respublika Fənn Olimpiadaları barədə videoçarx təqdim olunub və musiqi nömrələri səsləndirilib.
Respublika Fənn Olimpiadaları Kapital Bankın dəstəyi ilə həyata keçirilib.
