Cəlilabad icra başçısı Türkiyə üçün yığılan ianələrin yığılma məntəqəsini ziyarət edib. Bu haqda bu gün, 10 fevral tarixində Cenublu.az Cəlilabad RİH-yə istinadən xəbər verir.
Cəlilabad rayonu da türkiyəli soydaşlarımız üçün edilən yardım kampaniyasına qoşulub. Vətəndaşlarımız tərəfindən Cəlilabad, Göytəpə şəhərlərində və digər yaşayış ərazilərində yardım məntəqələri yaradılıb.
Cəlilabad Rayon İcra Hakimiyyətinin başçısı cənab Rafiq Cəlilov qardaş Türkiyə Respublikasında baş vermiş dəhşətli zəlzələ nəticəsində zərər çəkmiş şəxslərə köməklik göstərilməsi məqsədilə Cəlilabad şəhəri, Qurtuluş küçəsində müəyyən olunmuş məntəqədə yardımların hazırlanması və yardımları aparan nəqliyyat vasitələrinin yola salınması mərasimində iştirak edib.
Qeyd edək ki, içərisində müxtəlif ərzaq, isti geyim, konservləşdirilmiş qidalar, uşaq bezləri, yataq dəstləri və digər lazım olan ləvazimatlar 15 yük maşını ilə Cəlilabad rayonundan Bakı şəhərinə Türkiyə Respublikasına göndərilməsi üçün yola salınıb.
Toplanan yardımlar könüllülər tərəfindən çeşidlənir, qablaşdırılır və avtomobillərə yüklənir. Hazırda yardım toplama aksiyası davam edir.
Cəlilabad rayon sakinləri qardaş Türkiyədə baş vermiş güclü zəlzələ nəticəsində həlak olan insanlara Allahdan rəhmət diləyir, onların yaxınlarına və türk xalqına başsağlığı verir, yaralıların tezliklə sağalmalarını arzulayırlar.
