Masallı rayonu Çaxırlı kəndi ərazisində avtomobilin vurması nəticəsində həyatını itirən Həsənalı Abasovun ölümü ilə bağlı məhkəmə prosesi başa çatıb.
Belə ki, rayonun Kəlbəhüseynli kənd sakini, 1979-cu il təvəllüdlü Akif Bəhmənov (ad-soyad şərtidir) müttəhim kürsüsünə çıxarılıb.
Məlum olub ki, şəhid atası olan A.Bəhmənov "VAZ 2106" markalı avtomobili alkoqol və narkotik vasitənin təsiri altında, sürücülük hüququ olmadan idarə edib. Hadisədən sonra isə ərazidən uzaqlaşıb.
Təqsirləndirilən şəxs məhkəmədə hadisədən dərhal sonra polisə və təcili tibbi yardıma məlumat verdiyini desə də, bu, sübuta yetirilməyib.
A.Bəhmənov həmçinin həbs edilməkdən qorxmadığını, zərərçəkmişin hüquqi varisinin ona qarşı düzgün hərəkət etmədiyini və piyadanı vurub qaçdığına görə "əcəb etmişəm" dediyini bildirib. O, cəzanı məhkəmənin mülahizəsinə buraxıb.
Zərərçəkmişin hüquqi varisi isə təqsirləndirilən şəxslə barışmadığını və ona ən ağır cəzanın verilməsini xahiş edib.
Lənkəran Ağır Cinayətlər Məhkəməsinin hökmü ilə A.Bəhmənov Cinayət Məcəlləsinin 263-1.3 və 264-cü maddələri üzrə təqsirli bilinərək 6 il müddətinə azadlıqdan məhrum edilib.
Mənbə: xitab24.аz
