Bakının Suraxanı rayonunda 1991-ci il təvəllüdlü Saatlı sakini Cəfərlə 10 illik dostu Ramin arasında mübahisə cinayət işi ilə nəticələnib.
Hadisə yanvarın 24-də baş verib. Məlumata görə, dostlar bir neçə gün əvvəl birlikdə spirtli içki qəbul edərkən Ramin Cəfərin gödəkçəsini yerə salıb. Cəfər isə bunun qəsdən edildiyini düşünüb.
Hadisə günü Cəfər Raminə zəng edərək yenidən birlikdə içki içmək istədiyini bildirib. Lakin əvvəlki dəfə evin yığışdırılmasına kömək etmədiyinə görə Ramin buna razı olmayıb. Gödəkçə məsələsi yenidən gündəmə gəlib və tərəflər arasında telefonda mübahisə yaranıb.
Daha sonra Ramin Cəfəri evinə çağırıb. Görüş zamanı mübahisə yenidən qızışıb. Cəfərin sözlərinə görə, Ramin onu söyüb və bu, əsəbiləşməsinə səbəb olub. O, əvvəlcə dostunun sifətinə şillə vurub, daha sonra boynundan tutaraq yumruqla burnuna zərbə endirib. Ramin yerə yıxılıb, Cəfər isə evi tərk edib.
Cəfər məhkəmədə əməlini etiraf edib və peşman olduğunu bildirib. Tərəflər barışıb, Raminin ondan şikayət və tələbi qalmayıb.
Suraxanı Rayon Məhkəməsi Cəfərin cinayət məsuliyyətindən azad edilməsinə qərar verib.
Demokrat.az
