Ötən ay Azərbaycanda 5 stomatoloq və 1 kosmetoloqun qanunsuz fəaliyyəti aşkarlanıb.
Bu barədə Səhiyyə Nazirliyi Analitik Ekspertiza Mərkəzindən məlumat verilib.
Cari ilin sentyabr ayı ərzində 1 kosmetoloq (İnzibati Xətalar Məcəlləsinin 210.1-ci maddəsi ilə) və 7 stomatoloq barədə inzibati tənbeh tədbiri seçilərək, İnzibati Xətalar Məcəlləsinin müvafiq maddələrinə əsaslanan protokollar tərtib edilib. Belə ki, 7 stomatoloqdan 5 nəfəri 210.1-ci maddəsi ilə, 2 nəfəri isə 215.1-ci maddəsi ilə bağlı protokollar üzrə tədbir görülüb. Həmin protokollar aidiyyəti üzrə növbəti icraata göndərilib.
Bundan əlavə, 2 ümumi cərrahın ixtisasına uyğun olmayan plastik cərrahiyyə sahəsində fəaliyyət göstərməsi faktı aşkar edilib. Bu faktlarla bağlı İnzibati Xətalar Məcəlləsinin 215.1-ci maddəsi ilə 2 protokol tərtib edilib və protokollar müvafiq icraata göndərilib. Ümumilikdə sentyabr ayı ərzində 5 stomatoloq və 1 kosmetoloqun lisenziya olmadan özəl tibbi fəaliyyətlə məşğul olması faktı aşkar edilib. Qeyd olunan hallarla bağlı qanunvericilikdə nəzərdə tutulan tədbirlərin həyata keçirilməsi üçün müvafiq protokollar tərtib olunaraq aidiyyəti üzrə icraata göndərilib.
