Astara rayon İcra Hakimiyyətinin başçısı Qəzənfər Ağayev Siyaku kənd inzibati ərazi dairəsi üzrə nümayəndəliyinin Viləşə kəndində əhali ilə səyyar qəbul-görüş keçirib. Bu haqda məlumatı Cenublu.az bu gün, 3 avqust tarixində verir.
Görüşdə rayonun idarə və müəssisələrinin rəhbərləri iştirak ediblər.
İcra başçısı bildirib ki, son illər nümayəndəliyin ərazisində böyük işlər görülüb. Siyaku, Vaqo, Rinə, Marzəsə kəndlərində müasir tipli məktəb binaları tikilib, əsas yollar asfaltlanıb, qazlaşma aparılıb, sahilbərkitmə, elektrik xətt təsərrüfatında təmir işləri görülüb. Aqrar sahə, xüsusən sitrusçuluq inkişaf edərək ildən-ilə genişlənib. Müasir üsullarla yeni sitrus bağlarının salınması nəticəsində bol məhsul əldə olunub.
İcra başçısı daha sonra qeyd edib ki, kəndin əsas problemləri təbii qazın verilməsi, elektrik xətt təsərrüfatının, avtomobil yolunun əsaslı təmiri və çayda geniş məcratəmizləmə işlərinin aparılmasıdır. Hazırda Taxtanəkəran kəndinə qaz xəttinin çəkilməsinə başlanılıb. Burada işlər tamamlanandan sonra Viləşə və digər kəndlərə də qaz xətti çəkiləcək.
Həmçinin o əlavə edib ki, elektrik xətt təsərrüfatı rayonda tədricən tamamilə yenilənir. Bununla əlaqədar artıq müəyyən işlər görülür. Hazırda Pəlikəş, Sım istiqamətində yeni yüksəkgərginlikli elektrik xətləri çəkilir. Digər yaşayış məntəqələrində də əhaliyə fasiləsiz elektrik enerjisinin verilməsindən ötrü mütəmadi olaraq təmir işləri aparılır.
Sakinlər çıxış edərək kəndə qaz xəttinin çəkilməsinə, elektrik xətt təsərrüfatının yenilənməsinə, kənd yolunun təmiri üçün texnika verilməsinə, çay üzərində körpünün qoyulmasına, çayda sahilbərkitmə və məcratəmizləmə işlərinin aparılmasına, uşaqların Rinə kənd tam orta məktəbinə getmələri üçün nəqliyyat vasitəsinin ayrılmasına, sel sularının ziyan vurduğu fərdi yaşayış evlərinə baxış keçirilməsinə köməklik göstərilməsini xahiş ediblər.
İcra başçısı qaldırılan bəzi məsələlərin həlli ilə əlaqədar aidiyyəti üzrə tapşırıqlar verib, digərlərinin həllinin diqqətdə saxlanılacağını bildirib.
