Astara rayon İcra Hakimiyyətinin başçısı Qəzənfər Ağayev Pəlikəş kənd inzibati ərazi dairəsi üzrə nümayəndəliyə daxil olan Diqo kəndində sakinlərlə səyyar qəbul-görüş keçirib. Bu haqda məlumatı Cenublu.az bu gün, 24 iyul tarixində verir.
Kənddə keçirilən növbəti görüşdə rayonun idarə və müəssisələrinin rəhbərləri iştirak ediblər.
İcra başçısı bildirib ki, kənd mürəkkəb relyefə malik ərazidə yerləşdiyindən uzun illər yol, işıq, məktəb problemləri olub. Lakin artıq kəndə elektrik xətti çəkilib, modul tipli ibtidai məktəb binası quraşdırılıb. İndi internet xəttinin çəkilişi həyata keçirilir.
Sakinlər görülən işlərlə yanaşı, Diqo kəndindən Avyarud kəndinə gedən yolun təmiri və yolda qoyulmuş suötürücü boruların təmizlənməsi üçün texnika verilməsinə, kəndə internet şəbəkəsinin çəkilməsinə, yeni tikilmiş məktəbin tədris ilində istifadəyə verilməsinə, kənd sakininin Diqo kənd klubunda işlə təmin olunmasına köməklik göstərilməsini xahiş ediblər.
İcra başçısı vətəndaşlar tərəfindən qaldırılan müəyyən problemlərin həlli barədə aidiyyəti üzrə tapşırıqlar verib, digər məsələlərin həlli üçün tədbirlər müəyyənləşdiriləcəyini bildirib.
