Cəlilabad rayon sakini Səidə Həsənova yaşadığı Daşkəsən rayonunda qətl törədib. Bu haqda məlumatı Cenublu.az bu gün, 6 avqust tarixində verir.
Hadisə Daşkəsən rayonunun Xoşbulaq kəndində baş verib. Belə ki, 42 yaşlı Səidə Həsənova 27 iyul tarixində 66 yaşlı qayınanası Tahirə Məmməd qızı Qurbanovaya mübahisə zəminində balta ilə bir neçə xəsarət yetirib. Xəsarət alan şəxs əvvəlcə Daşkəsən xəstəxanasına, oradan isə Gəncəyə aparılıb. Daha sonra Bakıya aparılan qadın 7 gün komada qaldıqdan sonra vəfat edib.
Mərhumun qızı Şəlalə Qurbanovanın sözlərinə görə, Tahirə Qurbanovaya qarşı cinayət hadisəsi gecə saatlarında, yatdığı zaman törədilib.
Şəlalə Qurbanova qeyd edib ki, anası ilə gəlinləri arasında mübahisə olmayıb:
“Qardaşım yoldaşına Rusiyadan zəng edərək deyib: “Mən səninlə dolanmaq istəmirəm, çıx get”. Gəlin də razılaşıb şəxsi əşyalarını yığmışdı. Hər şey evin içində qalıb. Gecə qalxıb, evdə olan baltanı götürüb, anama zərbələr endirib. Səidə anamı gecə 3-4 arası, yatdığı zaman vurub”.
Şəlalə Qurbanovanın sözlərinə görə, qardaşı Səidə Həsənova ilə 1 ilə yaxındır, qeyri-rəsmi ailəlidir.Foto açıq mənbələr
Qeyd edək ki, qayınanasına balta ilə ağır xəsarətlər yetirən Cəlilabad rayon sakini olan Səidə Həsənova elə həmin gündən hadisə yerindən qaçıb. Onun tutulması istiqamətinə axtarışlar davam edir.
