Bu gün lənkəranlı şəhidin doğum günüdür.
Cenublu.az xəbər verir ki, şəhid Kamran Vəlizadənin dünyaya göz açmasından 28 il ötür.
Kamran Əkbər oğlu Vəlizadə 14 sentyabr 1996-cı ildə Lənkəran şəhərinin Nərimanabad kəndində anadan olub. 2004-2014-cü illərdə şəhid Elmar Məmmədov adına tam orta məktəbdə təhsil alıb. 2014-cü ildə Neft Akademiyasının energetika fakultəsinə qəbul olub.
Ondan ayrı qala bilməyən ailəsi onunla birlikdə Bakıya köçüb. 2018-ci ildə universiteti bitirən Kamran hərbi xidmətə gedib. Daşkəsənin Xoşbulaq kəndində 1 il xidmət edib. 2019-cu il iyulun 1-də xidmətini başa vurub, evinə qayıtdıqdan sonra fərqli işlərdə çalışıb. 2020-ci il 24-cü ad günündə peşəsi üzrə işə daxil olub. Lakin orada cəmi 14 gün işləyib.
Sentyabrın 28-də Kamran Vətən Müharibəsinə yollanıb. Cəbrayıl, Qubadlı uğrunda gedən döyüşlərdə qəhrəmancasına vuruşub.
Ömrünün son anlarında ailəsinə məktub yazıb. Məktubda anasına, atasına müraciət edib:
“Canım atam, anam, bacım.
2 gündür yaralıyam, kömək də gəlmir. Bu gün 23 oktyabrdır.
21 oktyabrda yaralandım. Çoxu şəhid oldu. Mən də ayağımdan yaralıyam, yeriyə bilmirəm, qalmışam burada.
Əgər şəhid olsam haqqınızı halal edin, heç vaxt pis olmayın. Başınızı dik tutun. İnşallah cənnətdə görüşərik”.
Kamran Əkbər oğlu Vəlizadə 23 oktyabr 2020-ci ildə Qubadlı rayonu istiqamətində döyüş tapşırığını yerinə yetirərkən şəhid olub.
