Lənkəranın Separadi kəndinin sakinləri olan nənələr Azərbaycan və talış xalq mahnılarının, bayatıların mahir ifaçılarıdır.
“Nənələr” xalq kollektivi 1970-ci ildə “Bacılar” adı ilə fəaliyyətə başlayıb. Buna səbəb ilk ifaçıların doğma bacılar olması idi. Maraqlı və gözəl ifa tərzi olan bacılar xınayaxdı, paltarkəsdi kimi gəlin məclislərinə gedərdilər.
Hazırda qrupun 6 üzvü var – Xanımbacı, Qızbəs, Gülbəzək, Şərəf, Rübabə və Bacıgül. 4 bacı ilə fəaliyyətə başlayan qrupda indi də bacılardan ikisi öz gözəl nəğmələri ilə qrupa rəng qatır. Onlar arasında ən yaşlısı 91 yaşlı Xanımbacı nənədir.
Kollektivlə Lənkəranda görüşən Ulu Öndər Heydər Əliyev onlara “Nənələr” adı verib. Elə o vaxtdan “Nənələr” kollektivi daha çox məşhurluq qazanıb. Kollektivin repertuarında Azərbaycan və talış dillərində yüzdən çox mahnı və bayatı var.
“Nənələr” qrupu ölkədə keçirilən festivallarda uğurla iştirak edib, diplomlarla təltif olunub. Məşhur “Ay lolo” mahnısı isə 2012-ci ildə “Grand” mükafatına layiq görülüb.
Kollektiv bu gün də yeni bayatılar, mahnılar üzərində işləyir, repertuarını daha da zənginləşdirir.
