Lənkəranda məktəblilər üçün 2 günlük düşərgə təşkil edilib. Bu haqda bu gün, 6 fevral tarixində Cenublu.az Məktəblilər üçün Sosial Sahibkarlıq Dərnəkləri Layihəsinə istinadən xəbər verir.
Azərbaycan Respublikasının Elm və Təhsil Nazirliyinin “Təhsildə İnkişaf və İnnovasiyalar üzrə 6-cı qrant müsabiqəsi”ndə qalib olmuş Masallı rayon Şatıroba kənd N.Əkbərov adına tam orta məktəbin icra etdiyi “Məktəblilər üçün sosial sahibkarlıq dərnəkləri” layihəsi çərçivəsində Masallı rayonunun 12 məktəbindən seçilmiş 15 nəfər yuxarı sinif şagirdləri üçün Lənkəran şəhərində 4-5 fevral tarixlərində 2 günlük Sosial Sahibkarlıq Düşərgəsi keçirilib.
Tədbiri giriş sözü ilə açan məktəbin direktoru və layihə rəhbəri Tural Nuriyev layihənin donoru və məqsədləri haqqında məlumat verib. O əlavə edib ki, Masallı rayonunun sosial-iqtisadi potensialını daha yaxından görmək üçün müxtəlif müəssisə və qurumlara infotur təşkil ediləcək.
Düşərgədə məktəblilərə öz təcrübəsini bölüşmək üçün mentorlar dəvət edilib. Həmçinin düşərgədə layihənin eksperti Nemət Əliyev və təlimçi Rafət Şirəliyev də iştirak ediblər. Onlar da müvafiq mövzular üzrə məktəblilər üçün düşərgə müddətində müxtəlif təlimlər, oyunlar və komanda işləri təşkil ediblər.
Sonda düşərgədə iştirak edən məktəblilərə sertifikatlar təqdim edilib.
