Bu gün Masallıdan olan Quru Qoşunlarının cavuşu şəhid Namiq Bağırovun doğum günüdür.
Namiq Bağırov 1984-cü il avqustun 30-da Masallı rayonunun Çaxırlı kəndində anadan olub. Fəxrimiz Çaxırlı kənd tam orta məktəbində təhsil aldıqdan sonra, 2001-ci ildə müddətli həqiqi hərbi xidmətə yollanıb.
Hələ uşaq ikən televizordan izlədiyi “20 Yanvar faciəsi”, “Xocalı faciəsi” və digər erməni fəlakətləri onun qəlbində düşmənə nifrət hissini alovlandırırdı. Elə bu istəklə arzularının üstündən qələm çəkib müddətdən artıq hərbi xidmətə başladı.
Namiq Bağırov Vətən müharibəsində iştirak edib. O, oktyabrın 6-sı Füzulinin azadlığı uğrunda gedən döyüşlərdə şəhadətə ucalıb. Şəhid böyüyüb başa çatdığı Çaxırlı kəndində dəfn olunub. Evli olan Namiq Vətənə qızını əmanət edib.
Şəhid Namiq Bağırov ölümündən sonra “Vətən uğrunda”, “Cəbrayılın azad olunmasına görə”, “Füzulinin azad olunmasına görə” medalları ilə təltif edilib.
