Masallıda akademik, fizika elmləri doktoru Ənvər Nəhmədovun anadan olmasının 65 illiyi ilə əlaqədar tədbir keçirilib.
Cenublu.az xəbər verir ki, tədbir rayon Mərkəzi Kitabxanasında baş tutub.
Görüşdə çıxış edən kitabxananın əməkdaşı Lətafət Əlirzayeva bildirib ki, Azərbaycanda fizika elminin görkəmli nümayəndələrindən biri Ənvər Nəhmədov 24 avqust 1959-cu ildə Bakı şəhərində anadan olub. O,1981-ci ildə Azərbaycan Dövlət Universitetinin Fizika fakültəsini qırmızı diplomla bitirib. Həmin ildən təyinatla AMEA-nın Fizika İnstitutunda akademik Fürudin Həşimzadənin rəhbərlik etdiyi laboratoriyada əmək fəaliyyətinə başlayıb.1982-84-cü illərdə SSRİ Elmlər Akademiyasının A.F.İoffe adına Fizika-Texnika İnstitutunda təcrübə keçib. Alimin nanostrukturlar fizikası üzrə elmi araşdırmaları Amerika və Avropanın nüfuzlu jurnallarında dərc olunub.
Sonra məruzə ilə çıxış edən kitabxananın əməkdaşı Rəşad İsmayılov vurğulayıb ki, Ənvər Əhmədov 1991-ci ildə Türkiyənin Marmara Universitetində, 1992-ci ilin sonundan isə İstanbul Texniki Universitetində professor kimi ingilis və türk dillərində magistr, bakalvr və aspirantlara dərs deyib. O, 1999-cu ildə Almaniyanın Würzburq Universitetinə, 2001-ci ildə isə Max-Planc İnstutuna dəvət olunub və Drezden şəhərində Kompleks Sistemlərinin Fizikası İnstitutunda professor Fuldenin qrupunda işləyib. 2002-ci ildə Saksoniyanın Chemnitz Texnik Universitetində işə başlayan Ə.Nəhmədov Drezden şəhərində MOSFET diodlarının dəlinmə mexanizmini öyrənən icra qrupu yaradıb.
Qeyd olunub ki, 2015-ci ildə Vətənə qayıdan alim AMEA Fizika İnstitutunda laboratoriya müdiri, eyni zamanda Moskva Dövlət Universitetinin Bakı filialının Fizika fakültəsində dekan vəzifələrində çalışıb. 90-a yaxın elmi məqalə, o cümlədən “Aşağı ölçülü sistemlərdə aşqar və korrelyasiya effektləri” kitabının müəllifi olub. Onun rəhbərliyi ilə fizika elmi üzrə fəlsəfə və elmlər doktorları hazırlanıb. Tədbir iştirakçılarının nəzərinə çatdırılıb ki, Ə.Nəhmədov çoxlu sayda beynəlxalq konfrans, simpozium və konqreslərdə məruzələrlə çıxış edib.
2021-ci ildə Bakı şəhərində vəfat edib.
