Ölkə ərazisində bir sıra tullantılara görə cərimələr tətbiq olunacaq.
APA-nın verdiyi məlumata əsasən, İnzibati Xətalar Məcəlləsinə müəyyən dəyişikliklər təklif edilib. Belə ki, məişət tullantılarının tutumlardan (urnalardan) kənar yerlərə atılmasına görə cəzalar artırılır.
Qüvvədə olan qanuna əsasən, məişət tullantılarının tutumlardan (urnalardan) kənar yerlərə atılmasına görə 50 manat məbləğində cərimə edilir. Layihəyə əsasən, həmin hərəkəti edən fiziki şəxslər üç yüz manat, vəzifəli şəxslər min manat, hüquqi şəxslər isə dörd min manat məbləğində cərimə olunacaqlar.
Nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər min manat, vəzifəli şəxslər min beş yüz manatdan iki min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, 60-100 saatadək ictimai işlər tətbiq olunur, hüquqi şəxslər beş min manatdan yeddi min manatadək məbləğdə cərimə edilir.
