Masallı rayonunun 26 yaşlı Musaküçə kənd sakini Elməddin Kərimovun bıçaqlanaraq qətlə yetirilməsi ilə bağlı məhkəmə prosesi başa çatıb. Bu haqda məlumatı Cenublu.az bu gün, 19 iyul tarixində Bizim.media-ya istinadən verir.
Lənkəran Ağır Cinayətlər Məhkəməsinin hökmünə əsasən, qətldə təqsirləndirilən 24 yaşlı Höccət Soltanov 11 il müddətinə azadlıqdan məhrum edilib.
Bir nəfərin ölümünə, digərinin həbsinə səbəb olan mübahisə isə qız üstündə baş verib. Belə ki, Sahib adlı şəxs (ad şərtidir) Elməddingilin məhəlləsindən keçərkən əlini yanında olan qızın çiyninə qoyub. Bu zaman Elməddin ona irad bildirib və bundan sonra mübahisə başlayıb.
Mübahisəyə dostlar da qarışıblar. Bundan sonra hamılıqla maşınlara minərək, Qızılhacılı meşəsinə gediblər. Burada dava zamanı mübahisəni aydınlaşdırmağa gələnlərdən Höccət Soltanov Elməddini bıçaqlayaraq qətlə yetirib.
Təqsirləndirilən şəxs məhkəmədə ifadəsində bildirib ki, mübahisə zamanı dostu Sahibin yerinə Elməddindən üzr istəyib, amma qarşı tərəf bunu qəbul etməyib.
Qeyd edək ki, hadisə ötən il sentyabrın 18-də baş verib.
