Lerikdən olan Aygün Bədəlova neyropsixoloq və beyin tədqiqatları üzrə gənc alimdir. Hazırda Böyük Britaniyada doktorantura təhsili alan tədqiqatçı Altsheymer və demensiya xəstələri üçün rəqəmsal reabilitasiya üsulları üzərində araşdırmalar aparır.
Elmi yoluna Azərbaycanda tibbi təhsillə start verən Aygün Bədəlova 2019-cu ildə Böyük Britaniyada "Cognitive Neuroscience and Neuropsychology" ixtisası üzrə magistratura təhsilinə başlayıb. "Royal Free Hospital"da fəaliyyət göstərərək psixi və neyroloji pozuntuları EEG metodları ilə tədqiq edib. Daha sonra "University College London"da doktoranturaya qəbul olunub.
Onun əsas tədqiqat mövzusu Altsheymer xəstəliyinin canlı beyin üzərində öyrənilməsi və demensiya üçün rəqəmsal terapiya yanaşmalarıdır. Alimin hazırladığı "Gotcha!" adlı tətbiq demensiyanın erkən mərhələsində olan şəxslərə yaxınlarının adlarını xatırlamaqda kömək edir. Aparılan sınaqlar terapiyanın yaddaş və beyin aktivliyinə müsbət təsir etdiyini göstərib.
Aygün Bədəlova həmçinin Azərbaycan Altsheymer Assosiasiyasının təsisçisidir. Assosiasiya cəmiyyətin maarifləndirilməsi və xəstələrə, ailələrə psixoloji dəstək məqsədi daşıyır.
Alim AZERTAC-a müsahibəsində vurğulayır ki, Altsheymer sadəcə yaşlanma deyil, erkən diaqnoz və düzgün yanaşma tələb edən ciddi xəstəlikdir. Aktiv həyat tərzi və zehni məşğuliyyət beyin sağlamlığında mühüm rol oynayır.
"Yaddaş zəifləyə bilər, amma insanlıq qalır. Ən vacibi empati və anlayışdır", – deyə Aygün Bədəlova bildirir.
