Bu gün Vətən müharibəsi şəhidi Elnur Dadıyevin anım günüdür.
Elnur Cəlal oğlu Dadıyev 1998-ci il martın 6-da Lerik rayonunun Buruq kəndində anadan olub. 2005-2011-ci illərdə Sabunçu rayonu 94 nömrəli, 2011-2013-cü illərdə isə Sabunçu rayonu, Balaxanı qəsəbəsi 69 saylı məktəbdə oxuyub. Məktəbi bitirən kimi 14 saylı Bakı Peşə Liseyinə daxil olub, 2016-cı ildə isə oranı bitirib.
2016-cı il avqustun 14-də həqiqi hərbi xidmətə çağırılıb. Ordu sıralarında qumbaraatan vəzifəsini daşıyıb. 2018-ci ildə hərbi xidmətini başa vurub.
E.Dadıyev Vətən müharibəsi başlayan kimi könüllü ordu sıralarına yazılıb və döyüşlərə qoşulub. Elnur Dadıyev 2020-ci il oktyabrın 28-də Füzuli istiqamətində gedən döyüşlərdə qəhrəmancasına şəhid olub.
Elnur ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə", "Cəsur döyüşçü" medalları və III dərəcəli “Vətənə xidmətə görə” ordeni ilə təltif edilib.
