Rusiyada məşhurlaşan Lerikdən olan müğənni Jony (Cahid Hüseynli) səs tellərində yaranan problemlərə görə bütün konsertlərini aprelin ortalarınadək təxirə salıb.
Cenublu.az xəbər verir ki, bu barədə "Mash Telegram" kanalı məlumat yayıb.
Martın 27-də Minsk şəhərindəki konserti zamanı səsini itirən müğənniyə həkimlər tərəfindən oxumaq və danışmaq qəti şəkildə qadağan olunub. Səs tellərində yaranan kəskin iltihab nəticəsində sənətçinin səhhəti çıxışdan əvvəl ağırlaşıb və ona beş dəfə adrenalin iynəsi vurulub.
İfaçı hazırda iltihabəleyhinə və hormonal müalicə kursu keçir. Eyni zamanda ona üç həftə ərzində səslə bağlı tam istirahət və sərt rejim təyin edilib. Tibb mütəxəssislərinin xəbərdarlığına görə, bu qaydalara əməl olunmaması səsin həmişəlik itirilməsi ilə nəticələnə bilər.
Müalicənin gedişindən asılı olaraq vəziyyət müsbətə doğru dəyişərsə, müğənninin aprelin 19-da yenidən səhnəyə qayıtması ehtimal olunur.
