Lerikdə yük avtomobilinin dərəyə aşması nəticəsində 27 yaşlı sürücü həyatını itirib.
Cenublu.az xəbər verir ki, hadisə rayonun Nəsədi kəndi ərazisində qeydə alınıb. Astara rayonunun Motlayataq kənd sakini Həmzə Pənah oğlu Mirseyidzadə idarə etdiyi QAZ-66 markalı yük avtomobili ilə hərəkətdə olarkən idarəetməni itirib və nəqliyyat vasitəsi dərəyə aşıb.
Ağır xəsarətlər alan sürücü yaxınlarının köməyi ilə Lənkəran Rayon Mərkəzi Xəstəxanasına çatdırılsa da, onun həyatını xilas etmək mümkün olmayıb.
Meyit daxili və xarici müayinə üçün Məhkəmə Tibbi Ekspertiza və Patoloji Anatomiya Birliyinin Lənkəran rayonlararası zona mərkəzinə təhvil verilib.
Faktla bağlı araşdırma aparılır.
Qeyd edək ki, sürücü 44 günlük Vətən müharibəsinin iştirakçısı olub. O, bu il fevralın 9-da ailə həyatı qurub.
