Lerik Rayon İcra Hakimiyyətinin başçısı Əkbər Abbasov Azərbaycan Respublikasının ali təhsil müəssisələrinə qəbul imtahanlarında yüksək bal toplayaraq ali məktəblərə, o cümlədən Qarabağ universitetinə qəbul olunmuş lerikli gənclərlə görüş keçirib.
Cenublu.az Lerik RİH-nə istinadən xəbər verir ki, Ə.Abbasov tələbə adını qazanaraq Qarabağ Universitetinə qəbul olunmuş gənclərə qeyd olunan universitetin ilk tələbələri olduqlarını xatırladaraq bunun böyük fəxr hissi doğurduğunu qeyd edib.
Lerik şəhər 3 nömrəli tam orta məktəbin məzunu, 660 balla Azərbaycan Dövlət İqtisad Universiteti İnformasiya təhlükəsizliyi fakültəsinə qəbul olunmuş Abbaszadə Yusif Hüsaməddin oğlu, Veri kənd tam orta məktəbinin məzunu, 633 balla Azərbaycan Tibb Universitetinə qəbul olunmuş Samizadə Elmar Fikrət oğlu, Lerik şəhər 1 saylı texniki fənlər təmayüllü liseyi qızıl medalla bitirmiş, 602 balla Milli Aviasiya Akademiyasının hüquq fakültəsinə qəbul olunmuş Fərəczadə Nübar Mübariz qızı, Züvüc kənd tam orta məktəbinin məzunu olmuş və Qarabağ Universitetinin menecment fakültəsinə qəbul olunmuş Hüseynli Elmina Ramil qızı və digərləri çıxış edərək gənclərin təhsil alması üçün ölkəmizdə yaradılan yüksək şəraitdən razılıqlarını bildiriblər.
Sonda ali məktəblərə qəbulda yüksək bal toplamış tələbələrə rayon rəhbəri tərəfindən təşəkkürnamə və hədiyyələr təqdim edilib.
Qeyd edək ki, bu il Lerikdə orta məktəblərini bitirən məzunlardan 140 nəfər tələbə adını qazanıb, bunlardan 6 nəfər 600-dən 19 nəfər isə 500-dən yuxarı bal toplayıb.
