Lənkəranda hərəkətdə olan avtomobilin üzərinə çürümüş ağac aşıb, nəticədə xəsarət alanlar olub.
Cenublu.az xəbər verir ki, hadisə səhər saatlarında köhnə Ələt–Astara magistralında, rayonun Parakənd kəndi ərazisində baş verib. Astara rayonunun Təngərüd kənd sakini, 59 yaşlı Dəmir Müzəffərovun idarə etdiyi "VAZ-2107" markalı avtomobil Lənkəran istiqamətində hərəkətdə olarkən, yol kənarındakı çürümüş ağac aşaraq nəqliyyat vasitəsinin üzərinə düşüb.
Nəticədə avtomobildə sərnişin qismində olan sürücünün qızı, 38 yaşlı Nüşabə Müzəffərova və onun qaynanası, 66 yaşlı Təzəgül Babayeva müxtəlif dərəcəli bədən xəsarətləri alıblar. Yaralılar Lənkəran Rayon Mərkəzi Xəstəxanasının Təcili Tibbi Yardım şöbəsinə hospitalizasiya olunublar. Onlara ilkin tibbi yardım göstərilib, müalicələri davam etdirilir.
Məlumata görə, qəzada xəsarət alan qadınlardan biri həkim qəbuluna getmək üçün yola çıxıbmış.
Kənd sakinlərinin sözlərinə görə, həmin ərazidə bu cür təhlükəli vəziyyətdə olan bir neçə ağac mövcuddur və onların aşma riski qalmaqdadır. Sakinlər bildirirlər ki, məsələ ilə bağlı dəfələrlə aidiyyəti qurumlara müraciət edilsə də, indiyədək tədbir görülməyib.
Hadisə nəticəsində yola aşan ağac digər nəqliyyat vasitələrinin hərəkətinə də maneə yaradıb. Sakinlərin köməyi ilə ağac yoldan kənarlaşdırılıb və hərəkət bərpa olunub.
Faktla bağlı araşdırma aparılır.
