Bu gün Vətən müharibəsi şəhidlərimizin – Ülfət Babazadə və Kamran Səmədovun doğum günüdür.
Ülfət Qabil oğlu Babazadə 2000-ci ildə fevralın 28-i Lənkəran rayonunun Daştatük kəndində anadan olub. 2019-cu ildə Azərbaycan Silahlı Qüvvələrinin sıralarında müddətli həqiqi hərbi xidmətə başlayıb. O, Cəlilabaddakı hərbi hissədə Xüsusi Təyinatlı Qüvvələrin sıralarında xidmətə göndərilib.
Vətən müharibəsi başlayanda o, həvəslə cəbhəyə yollanır, Kəlbəcər, Cəbrayıl, Füzuli və Şuşa rayonlarının işğaldan azad olunmasında fəal iştirak edib. Şuşa şəhərinin işğalçılardan azad olunmasında xüsusi hünər göstərib.
O, 9 noyabr – müharibənin son günündə Şuşa döyüşləri zamanı şəhid olub. Lənkəran rayonunda torpağa tapşırılıb.
Ölümündən sonra “Cəsur döyüşçü”, ”Vətən müharibəsi iştirakçısı”, “Kəlbəcərin azad edilməsinə görə”, “Xocavəndin azad edilməsinə görə” medalları ilə təltif edilib.
Kamran Ceyhun oğlu Səmədov 1997-ci ildə fevralın 28-i Lənkəran rayonunun Liman şəhərində anadan olub. Vətən müharibəsi zamanı Qubadlı rayonunun azadlığı uğrunda gedən döyüşlərdə iştirak edib. K.Səmədov 31 oktyabr 2020-ci ildə Qubadlı döyüşləri zamanı şəhidlik zirvəsinə ucalıb.
Ölümündən sonra “Vətən uğrunda”, “Cəsur döyüşçü”, “Qubadlının azad olunmasına görə” və “Cəbrayılın azad olunmasına görə” medalları ilə təltif edilib.
