Bu gün lənkəranlı şəhid Mirxəyal Valeh oğlu Kərimzadənin doğum günüdür.
Qəhrəman şəhid 1999-cu il yanvarın 10-da Lənkəran şəhərində anadan olub. Orta təhsilini Lənkəran şəhər 9 saylı və 7 saylı tam orta məktəblərində alıb.
2018-ci ildə hərbi xidmətini başa vurduqdan sonra kompüter texnologiyaları mütəxəssisi kimi çalışmağa başlayıb.
Vətən müharibəsi zamanı Füzuli və Xocavənd istiqamətində gedən ağır döyüşlərdə iştirak edib. Xocavəndin Yuxarı Veysəlli kəndinin alınmasında xüsusi igidlik göstərərək düşmənə sarsıdıcı zərbələr endirib və xeyli sayda canlı qüvvə məhv edib.
3 noyabr səhər saatlarında Xocavənd uğrunda gedən ağır döyüşlərdə o, yaralanmış komandirini və bir neçə döyüş yoldaşını döyüş meydanından çıxararaq onlara ilk tibbi yardım göstərir. Zirehli üst geyimini çıxararaq, yaralı komandirinin üstünə atır, onun həyatını xilas edir və yenidən döyüşə davam edir. Bir neçə dəqiqə sonra düşmən tərəfindən açılan atəş Mirxəyalın qarın boşluğuna tuş gəlir və o, qəhrəmancasına şəhid olur.
Kərimzadə ölümündən sonra “Xocavəndin azad olunmasına görə”, “Füzulinin azad olunmasına görə”, “Hərbi xidmətlərə görə” və “Vətən uğrunda” medalları ilə təltif edilib.
