Lənkəranın Viravul kəndində 4500-dən çox insana xidmət göstərən poçt şöbəsi fəaliyyətini dayandırıb. Bu haqda məlumatı Cenublu.az bu gün, 13 iyul tarixində Oxu.az-a istinadən verir.
Sakinlər ya şəhər mərkəzinə, ya da 10 kilometr məsafədə yerləşən Vilvan kəndinə getmək məcburiyyətində qalırlar.
"Poçt şöbəsi 10-15 gündür bağlanıb. İnsanlar çətin vəziyyətdədirlər. Vilvan kəndindəki poçt şöbəsinə getmək üçün iki dəfə avtobus dəyişməliyik. Lənkəranın mərkəzinə getmək üçün isə 1 gün vaxt lazımdır. Bu isə kənd adamı üçün bir günlük işinin batması deməkdir. Həm vaxtımız itir, həm də maddi cəhətdən ziyana düşürük", – kənd sakini narazılığını bildirib.
Məsələ ilə bağlı “Azərpoçt”un mətbuat katibi Afaq İbrahimova bildrib ki, AZ 4233 Viravul kənd poçt şöbəsində aparılan müşahidələr göstərir ki, vətəndaşlar burada klassik poçt xidmətlərindən istifadə etmirlər. Beləliklə, şöbəni saxlamaq üçün xərclər gəlirləri üstələyir və bu səbəbdən poçt şöbəsi fəaliyyətini dayandırıb. Vətəndaşlar Viravul kəndindən 2,5 km aralıqda yerləşən AZ 4234 Vilvan kənd poçt şöbəsinə müraciət edə bilərlər. Həmçinin qeyd olunub ki, vətəndaşlar qeyri-poçt əməliyyatlarını aparmaq üçün alternativ yollardan istifadə edə bilərlər.
