Lənkəranda fermerlərin əkin sahələrində suvarma suyuna olan təlabatını ödəmək üçün tikinti işləri aparılır. Bu haqda məlumatı Cenublu.az bu gün, 3 avqust tarixində verir.
Dövlət Su Ehtiyatları Agentliyi Yuxarı Xanbulançay Hidroqovşağı İstismar İdarəsi tərəfindən Lənkəranda sonuncu suötürücü bəndin tikintisi gedir. Cari ilin yarısı ərzində 284 min kubmetr həcmində 59,1 km uzunluğunda texnikalarla hamarlanma, qazıntı işləri aparılıb, kanal və kollektorlar lildən təmizlənib, çay məcralarının təmizlənməsi və yönəldilməsi, eləcə də dambaların, bəndlərin qurulması işləri görülüb. İşlərlə əlaqədar 7804 su istehlakçısının təsərrüfatında olan təlabat yaxşılaşacaq.
Həmçinin Boladi kəndi ərazisində Ulyum çayı üzərində 2 yerdə suyun istiqamətini yönəldən müvəqqəti bəndlər bərpa olunub və digər ərazilərdə də bu işlər görülüb. Hal-hazırda Vilvan kəndi, Veravul çayı üzərində bəndin yenidən qurulması işləri gedir və yekunlaşmaq üzrədir.
Lənkəranda 9533 hektar, Lerikdə isə 284 hektar suvarılan torpaq sahələri mövcuddur. Sözügedən torpaq sahələri Yuxarı Xanbulançay Hidroqovşağı İstismar İdarəsi tərəfindən suvarılır.
