Lənkəranda şəhid Əhədzadə Xəyal Əlövsət oğlunun doğum gününə həsr olunmuş tədbir keçirilib.
Cenublu.az xəbər verir ki, görüş Mədəniyyət Mərkəzində baş tutub. Burada Şəhər İcra Hakimiyyəti başçısının müavini - İctimai-siyasi və humanitar məsələlər şöbəsinin müdiri Ülviyyə Əliyeva və digər rəsmilər, şəhid ailələrinin üzvləri, müharibə əlilləri, rayon ictimaiyyətinin nümayəndələri, şəhidin təhsil aldığı A.Əmrahov adına Üzümçülük qəsəbə tam orta məktəbin müəllim və şagird heyəti iştirak edib.
Tədbirdə iştirakçılar öncə şəhidin şəxsi əşyalarından və fotolarından ibarət sərgi ilə tanış olublar. Sonra şəhidin həyat yolunu özündə əks etdirən videoçarx izlənilib.
Daha sonra çıxış edən natiqlər Xəyal Əhədzadənin həyat və döyüş yolundan bəhs ediblər.
Lənkəran şəhər Heydər Əliyev Mərkəzinin fond müdiri Aygün Əkbərova belə vətənpərvər, mərd, igid oğullar böyütdükləri üçün şəhid valideynlərinə minnətdarlığını bildirib. Sonra mərkəzin rəsm studiyasında yağlı boya ilə çəkilmiş Xəyal Əhədzadənin portretini valideynlərinə təqdim edib.
Yekunda xatirə şəkilləri çəkilib.
"Tariximiz qürurumuzdur" layihəsi çərçivəsində keçirilən tədbir Heydər Əliyev Mərkəzinin təşkilatçılığı ilə həyata keçirilib.
