Lənkəran rayonu Aşağı Nüvədi qəsəbə tam orta məktəbində Vətən müharibəsi şəhidi Romir Əliyevin xatirəsinə həsr olunmuş “Güvənli dəstək” bilik layihəsi baş tutub.
Cenublu.az xəbər verir ki, web alətləri üzərində keçirilən layihədə qəsəbənin icra nümayəndəsi və müavini, Azərbaycan Vətən Müharibəsi Veteranları İctimai Birliyinin rəhbər şəxsləri iştirak ediblər. Burada Wordwall, learning apps, jeopardy web alətlərindən istifadə olunub.
Tədbirdə şəhidin döyüş yoldaşları Rauf Salayev və Ağasəlim Camalov Romir Əliyevin döyüş yolundan və qəhrəmanlığından bəhs ediblər.
Tədbir məktəbin direktoru Nisə Camalova və riyaziyyat müəllimi Gülnaz Camalova tərəfindən təşkil edilib.
Sonda tədbirdə iştirak edən komandalara sertifikat, medal və kubok təqdim olunub.
Qeyd edək ki, bu gün Romir Əliyevin il dönümüdür. Vətən müharibəsinə könüllü qoşulan Romir Cəbrayılın, Füzulinin və Zəngilanın azad edilməsi uğrunda gedən döyüşlərdə savaşıb. O, 22 oktyabr 2020-ci ildə Qubadlının azad olunması uğrunda döyüş tapşırığını yerinə yetirərkən şəhid olub.
Ölümündən sonra “Vətən uğrunda”, “Cəsur döyüşçü”, “Cəbrayılın azad olunmasına görə” və “Qubadlının azad olunmasına görə” medalları və 3-cü dərəcəli “Vətənə xidmətə görə” ordeni ilə təltif edilib.
