Lənkəran şəhər Heydər Əliyev Mərkəzinin təşkilatçılığı ilə "Tariximiz qürurumuzdur" layihəsi çərçivəsində Lənkəran şəhər Mədəniyyət Mərkəzində şəhid Qulamzadə Afərin Müqəddəs oğlunun doğum gününə həsr olunan tədbir keçirilib. Bu haqda məlumatı Cenublu.az bu gün, 16 iyul tarixində verir.
Tədbirdə Lənkəran Şəhər İcra Hakimiyyəti başçısının müavini – İctimai-siyasi və humanitar məsələlər şöbəsinin müdiri Ülviyyə Əliyeva və digər rəsmilər, şəhid ailələrinin üzvləri, müharibə əlilləri, şəhidin təhsil aldığı M.Fərzullayev adına Lənkəran rayonu Mamusta kənd tam orta məktəbinin müəllim və şagirdləri, rayon ictimaiyyətinin nümayəndələri iştirak ediblər.
Tədbir iştirakçıları öncə şəhidin şəxsi əşyalarından və fotolarından ibarət sərgi ilə tanış olublar.
Şəhid Afərin Qulamzadənin həyat yolunu özündə əks etdirən videoçarx izlənildikdən sonra Azərbaycan Ordusunun zəfər yürüşündən, 44 günlük Vətən müharibəsində göstərilən igidlik və qəhrəmanlıqlardan, eləcə də şanlı qələbəmizin tarixi əhəmiyyətindən danışılıb. Çıxışdan sonra şəhidin ailə üzvlərinə Heydər Əliyev Mərkəzinin rəsm studiyasında yağlı boya ilə çəkilmiş Afərin Qulamzadənin portreti təqdim edilib.
Tədbirdə məktəblilər Vətən və şəhidlərə həsr olunan milli ruhda şeirlər söyləyiblər.
Sonra mərhum ifaçı, söz ustadı Elnur Valehin şəhid Afərin Qulamzadənin əziz xatirəsinə həsr etdiyi klip və digər tanınmış ifaçıların şəhidlər haqqında mahnıları dinlənilib.
Çıxış edən natiqlər Afərin Qulamzadənin həyat və döyüş yolundan, Vətən müharibəsində qazanılan qələbədə igid oğullarımızın göstərdikləri qəhrəmanlıqlardan danışıblar.
Sonda xatirə şəkilləri çəkilib.
