Lənkəranda Polis Günü ilə bağlı Lənkəran Şəhər Rayon Polis Şöbəsində tədbir keçirilib. Bu haqda məlumatı Cenublu.az bu gün, 2 iyul tarixində verir.
Öncə tədbir iştirakçıları ümummilli lider Heydər Əliyevin abidəsini ziyarət edib, önünə tər güllər düzüb, ona olan hörmət və ehtiramlarını ifadə ediblər.
Tədbirin rəsmi hissəsində daxili işlər naziri general-polkovnik Vilayət Eyvazovun şəxsi heyətə təbrik məktubu oxunub. Lənkəran Şəhər-Rayon Polis Şöbəsinin rəisi Azər Cahangirov rəhbərlik etdiyi şəxsi heyəti təbrik edib, onlara xidməti fəaliyyətində uğurlar və cansağlığı arzulayıb. Daha sonra şəhər başçısı Taleh Qaraşov polisin keçdiyi şərəfli tarixi yol barədə danışıb.
Sonda Lənkəran Şəhər Rayon Polis Şöbəsinin şəxsi heyətinin bir qrup üzvünə fəxri fərmanlar, təşəkkürnamə və pul mükafatları təqdim edilib.
