Lənkəran Şəhər İcra Hakimiyyəti başçısının Separadi kənd nümayəndəsinin rəhbəri Ağahüseyn Hüseynovun şəxsi avtomobili yararsız hala salınıb.
Qaynarinfo-nun məlumatına görə, hadisə onun qohumu tərəfindən törədilib.
Belə ki, Ağahüseyn Hüseynov qəbuluna gələn 67 yaşlı qohumu Hüseyn Tağıyev ilə mübahisə edib. Mübahisəyə səbəb təqsirləndirilən şəxsin DOST Mərkəzində işləyən Əli (şərti ad) adlı oğluna görə olub.
Hüseyn Tağıyevin DOST-da işləyən oğlu işdən çıxarılıb. O, oğlunun işdən çıxarılmasını Separadi kənd nümayəndəsinin rəhbəri vəzifəsində işləyən bibisi nəvəsinin təşkil etdiyini güman edib. Hüseyn Tağıyev və oğlu Əli Ağahüseyn Hüseynovla mübahisə etikdən sonra binanı tərk edərək həyətə düşüblər. Təqsirləndirilən şəxs idarə etdiyi "VAZ 2108" markalı avtomobil ilə zərərçəkmiş şəxsin "Hyundai Santafe" markalı maşınına zərbə vurub.
Ağahüseyn Hüseynov bildirib ki, Hüseyn Tağıyev şüurlu şəkildə idarə etdiyi avtomobillə onun maşınını vurub:
"Mənə 2800 manatdan çox zərər dəyib. Hüseynin DOST Mərkəzində fəhlə vəzifəsində çalışan oğlu bir aydan çox işə getməyib. Onun kimi bir neçə nəfər də var. Özü də gəlib hər ay mənimlə dalaşır ki, mənə əmək haqqı yazdır. Hesab edir ki, işə çıxmamağının ona aidiyyəti yoxdur. Hər dəfə də dava salıb gedirdilər. Bu məsələ də aktlaşdırılıb".
Məhkəmənin qərarı ilə Hüseyn Tağıyev İnzibati Xətalar Məcəlləsinin 232-ci maddəsində nəzərdə tutulan inzibati xətanı törətməkdə təqsirli bilinib və barəsində vurulmuş ziyanın bir misli - 1525 manat məbləğində cərimə növündə inzibati tənbeh tədbiri tətbiq edilib.
