Lənkəran rayonunun İstisu qəsəbəsində salınmış “Dostluq Parkı”nın açılışının 1 illiyi ilə əlaqədar tədbir baş tutub. Bu haqda məlumatı Cenublu.az bu gün, 2 avqust tarixində verir.
Tədbirə Lənkəran ŞİH başçısının müavini – İctimai-siyasi və humanitar məsələlər şöbəsinin müdiri xanım Ülviyyə Əliyeva, ABŞ-nin Azərbaycandakı səfirliyinin ictimai işlər üzrə attaşesi Melissa Şauqnessi, Lənkəran–Monterey Dostluq Assosiasiyasının həmsədri Nensi Selfric və Azərbaycan Diplomatik Akademiyasının (ADA) müəllimi Şəfəq Mehralıyeva cəlb olunublar.
Burada Lənkəran Şəhər Mədəniyyət Mərkəzinin “Nənələr” xalq folklor kollektivinin və mərkəzin solistlərinin ifasında bədii hissə baş tutub, maraqlı ifalar təqdim edilib.
“Dostluq Parkı” Lənkəranla ABŞ-nin Monterey şəhəri arasında “qardaşlaşmış şəhərlər” çərçivəsində salınıb. Adət-ənənələrin, mədəni münasibətlərin, iqtisadi əlaqələrin, habelə Azərbaycanla bağlı həqiqətlərin dünya ictimaiyyətinə dolğun şəkildə çatdırılmasında şəhərlərin qardaşlaşmasının mühüm rolu var.
