Lənkəranda yağan yağış Veravulçayın daşmasına səbəb olub. Nəticədə rayonun Vilvan kəndində torpaq sürüşməsi baş verib.
Cenublu.az-ın verdiyi xəbərə görə, sel səbəbindən kənddə 10-a yaxın ailənin yaşadığı evlər üçün təhlükəli vəziyyət yaranıb, eləcə də sel suları sakinlərin təsərrüfatlarına da xeyli ziyan vurub. Təbii fəlakət nəticəsində vətəndaşların meyvə və sitrus ağaclarını, salınan istixanaları sel aparıb.
Sakinlər deyir ki, çaya sel gələndən sonra torpaq qatı təqribən 15 - 20 metrə yaxın yuyulub. Bir həyətyanı sahədən 100 sota yaxın torpağı sel suları aparıb.
Ərazidə yaranan vəziyyətlə bağlı Lənkəran rayon Su Meliorasiya idarəsi tərəfindən həyətyanı sahələrə baxış keçirilib, əraziyə ağır texnikalar cəlb olunub. İdarənin mütəxəssisi Ayıq Əliyev bildirib ki, ötən il də idarə tərəfindən çayda məcradəyişmə işləri görülüb, lakin yağışların çox olmasına görə görülən işlər sıradan çıxıb: “Biz yerindəcə baxış keçirdikdən sonra məlum oldu ki, intensiv yağan yağışlar nəticəsində həyətyanı torpağa külli miqdarda ziyan dəyib. Bununla əlaqədar idarəmiz tərəfindən ağır texnikalar ayrılıb, orda iş görüləcək. Gələcəkdə sahilbərkitmə işləri də nəzərdə tutulub”.
Qeyd edək ki, bu günə kimi Veravulçayın Vilvan və Veravul kəndlərindən keçən hissəsində sağ və sol sahilində 2800 paqonmetr uzunluğunda betondan mühafizə divarı tikilib.
[URIS id=68856]
