Lənkəran Dövlət Universiteti (LDU) üçün daha bir yeni tədris binası inşa olunacaq.
İqtisadiyyat.az xəbər verir ki, yeni bina Füzuli küçəsi, 170 A ünvanında yerləşən tədris binasının həyətində tikiləcək.
İnşası planlaşdırılan tədris binası 4 mərtəbəli olacaq. LDU yeni tədris binasının layihə-smeta sənədlərinin hazırlanması işlərinə başlayıb.
Qeyd edək ki, hazırda ali təhsil müəssisəsinin H.Aslanov küçəsi, 50 ünvanında yerləşən yeni 2 mərtəbəli inzibati binasının tikintisi aparılır. Bundan əlavə, H.Z.Tağıyev küçəsi, 118 ünvanında da universitetin 5 mərtəbəli yeni tədris binasının inşası ilə bağlı hazırlıqlar davam etdirilir.
Eyni zamanda, universitetin 1 saylı tədris binasının həyətində isə LDU-nun Baytarlıq klinikasının inşası planlaşdırılıb.
Xatırladaq ki, LDU 1991-ci ildə Bakı Dövlət Universitetinin filialı kimi fəaliyyətə başlayıb, 1992-ci ildə isə müstəqil dövlət universitetinə çevrilib. Hazırda universitetdə 5000-ə yaxın tələbə bakalavr, magistratura və doktorantura səviyyəsi üzrə təhsil alır, 400-ə yaxın professor-müəllim və inzibati heyət çalışır.
