“Çağdaş Təhsil” jurnalının təsisçisi Zeynalov Vüsal Fazil oğlu Lənkəran-Astara Regional Təhsil İdarəsində ictimai asayişi pozduğuna görə, habelə qurumun əməkdaşlarını təhqir etdiyinə görə azadlıqdan məhrum olunub. Bu haqda məlumatı Cenublu.az bu gün, 17 fevral tarixində Lənkəran-Astara Regional Təhsil İdarəsinə istinadən verir.
Belə ki, 1 sentyabr 2022-ci il tarixində o, Lənkəran-Astara Regional Təhsil İdarəsinə gələrək ictimai asayişi, eyni zamanda vətəndaş qəbulu zamanı idarənin iş rejimini 3 saat ərzində pozub və idarə əməkdaşlarına qarşı təhqiramiz ifadələr işlədib. Səbəb isə Regional Təhsil İdarəsi tərəfindən məktəb direktorlarına ödənişli əsaslarla şagird nailiyyətlərinin hər hansı media qurumunda paylaşılmasına razılıq verilmədiyi ilə bağlı təlimat olub.
Hadisə ilə bağlı araşdırma aparılıb və Lənkəran Rayon Məhkəməsinin 06.02.2023-cü il tarixli 1(049)-59/2023 nömrəli hökmü ilə Zeynalov Vüsal Fazil oğlu Azərbaycan Respublikası Cinayət Məcəlləsinin 221.1-ci maddəsində (Xuliqanlıq, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, şəxslər üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər) nəzərdə tutulmuş cinayət əməlini törətməkdə təqsirli bilinərək 9 (doqquz) ay müddətinə azadlığın məhdudlaşdırılması cəzasına məhkum olunub.
