“99% ehtimal var ki, Lənkəranda itkin düşən balıqçılar İran tərəfdədirlər”.
Bu barədə cenublu.az-a itkin düşmüş balıqçılardan biri - Mahmud İbayevin qardaşı Rəşad İbayev deyib.
Onun sözlərinə görə, artıq 4 gün olacaq ki, balıqçılardan heç bir xəbər yoxdur: “Dənizin üstündə heç bir iz tapa bilmirik. Ən azından kanistr, ya taxta suyun üzərində olmalıdır. Sosial şəbəkələrdə də yalan məlumat yayırlar. Onlara heç kim inanmasın. Elə bir şey olsa, birinci dövlət səviyyəsində bilinər. Amma biz hələ belə bir şey bilmirik. Orqanlardan xahiş edirik ki, bizə dəstək versinlər. Hamı deyir ki, şükür, gözümüz aydın. Amma biz belə şeylərə inanmırıq. Yalandır, heç kim inanmasın. Eşitdiyimizə görə, guya, yerli camaat deyir ki, gəmi tutub İrana aparıb. O da ola bilər. Çünki ehtimal onu göstərir ki, burada iz yoxdursa, 99% biz oranı gözləyirik. Harada olur olsun, təki salamat olsunlar.”
Balıqçının həyat yoldaşı Zülfiyyə İbayeva da axtarışların heç bir nəticə vermədiyini, ümidlərin tükəndiyini bildirir.
Uzun müddət balıqçılıqla məşğul olan Ağabala Eyvazovun sözlərinə görə, qayıq batmış hesab olunursa, mütləq nəsə üzə çıxır. Qayıqda xilasedici geyimi, taxta panel olur. “Biz özümüz də fikirləşirik ki, sərhədi pozublar. Ola bilər, sərhədi pozublar və İran sularındadırlar”.
Qeyd edək ki, bu gün də aidiyyəti dövlət orqanları tərəfindən balıqçıların axtarışları fasiləsiz davam etdirilir.
