Aprelin 16-da Bakının Sabunçu rayonu, Maştağa qəsəbəsində dayı qızı və bibi qızı olan iki yeniyetmə – 2008-ci il təvəllüdlü Aygün Hüseynova və 2007-ci il təvəllüdlü Reyhan Hüseynova evdən çıxaraq bir daha geri dönməyiblər.
Cenublu.az xəbər verir ki, qızların ailələri bildirir ki, onların hər ikisi mobil telefonsuz olub və təhlükəsizlik kameralarına da düşməyiblər. Polis əməkdaşları itkin düşdükləri gündən bu yana axtarış aparsalar da, hələlik heç bir nəticə əldə edilməyib.
Qızlardan biri – Reyhanın anası Gülsevər Hüseynova verdiyi müsahibədə, qızların evdə ciddi nəzarət altında böyüdüklərini, azadlıq istəyindən danışdıqlarını və son günlərdə psixoloji narahatlıq əlamətləri göstərdiklərini bildirib. Hətta qızlardan birinin bir neçə gün əvvəl tanış olduğu bir şəxslə sosial şəbəkə üzərindən "həyatımdan bezmişəm" tipli mesajlar yazdığı da məlum olub.
Ailə üzvləri qızların heç bir sosial problem yaşamadığını, ancaq son zamanlar emosional olaraq narahat olduqlarını deyir. Qızların ailələrinin Astara və Lerikdə olan qohumları da axtarışlardan məlumatlıdır.
Valideynlər qızlara müraciət edərək evə qayıtmalarını istəyirlər:
"Onlar bizim balalarımızdır. Nə baş veribsə, birlikdə həll edərik. Sadəcə qayıtsınlar."
Hazırda hüquq-mühafizə orqanları tərəfindən axtarışlar davam etdirilir.
